Hér á eftir koma titlar nýrra bóka sem komnar eru í útlán hjá Bókasafni Grindavíkur:

í sumar verða nýjustu kiljurnar (skáldsögur og reyfarar) keyptar jöfnum höndum - lánaðar í 10 daga í einu fyrst um sinn.

Íslensk knattspyrna 2009 eftir Víði Sigurðsson

Merkiskonur sögunnar eftir Kolbrúnu S. Ingólfsdóttur. Hér er minnst m.a. fornaldarkvenna, íslenskra valkyrja, öldubrjóta, erfðadrottninga, siðskiptakvenna, brautryðjenda, hugsjónakvenna og jafnréttissinna.

Kirkja hafsins eftir Ildefonso Falcones. ánauðugur spænskur bóndi brýst undan oki lénsherra síns og leitar frelsisins í Barcelona með son sinn, Arnau. Drengurinn vex upp í skjóli kirkjunnar stóru sem lágstéttir borgarinnar eru að reisa að eigin frumkvæði. Hann finnur forboðna ást og þraukar í gegn um hungursneyð, stríð drepsóttir...

Ég er Nojoud 10 ára - fráskilin, skráð af Delphine Minoui. Litla jemenska stúlkan Nojoud sýndi sýndi ótrúlegan kjark þegar hún óskaði eftir skilnaði og reis þar með upp gegn fornum hefðum í landi sínu.

Blómin fá Maó eftir Hlín Agnarsdóttur. Sagan hefst inni í pottaskáp í Drápuhlíð í janúar 2009. Húsráðandinn, Sigurborg Eyfjörð félagsráðgjafi, er að leita að hentugum dalli til að lemja á Austurvelli þegar síminn hringir...

Bankster eftir Guðmund Óskarsson. "Þið kannist náttúrulega við orðið gangster, ha, þetta gamla góða? En hafið þið heyrt ym bankster' Nei? Jaæja, en það þýðir auðvitað það nákvæmlega sama. Helvíti gott!

Niðri á sextugu: af lífssigi Kjartans Sigmundssonar bjargmanns frá Hælavík á Hornströndum, Finnbogi Hermannsson skráði. Kjartan var sem skapaður til að fást við bjargsig og eggjatöku og var stundum sagt að hann væri af fuglakyni en ekki manna, svo var hann fær í bjarginu.

Heim til míns hjarta - ilmskýrsla um árstíð á hæli eftir Oddnýju E. Ævarsdóttur. Kona með kramið hjart leitar hjálpar á hæli. Sérfræðingar komast að þeirri niðurstöðu að hún sé útbrunnin...

Meiri hamingja - leyndardómur daglegrar gleði og varanlegrar lífsfyllingar eftir Dr. Tal Ben-Shahar. Hin byltingarkennda "jákvæða sálfræði" fer nú sigurför um heiminn og miðlar hagnýtum upplýsingum til venjulegs fólks um leiðir sem gagnast til að auka hamingju sína.

Augnablik: hæfileikinn til að hugsa án umhugsunar eftir Malcolm Gladwell. Þessi bók fjallar um það þegar við "vitum" eitthvað án þess að vita af hverju. Höfundur, sem er einn frumlegasti hugsuður okkar tíma, kannar fyrirbærið "augnablik" frá ýmsum hliðum og sýnir fram á hvernig skyndiákvörðun getur reynst mun betri en ákvörðun sem er vandlega ígrunduð.

Fimmta barnið eftir Eyrúnu Ý. Tryggvadóttur. Andrea Þórðardóttir birtist lesendum fyrst í sögunni Hvar er systir mín? Þrátt fyrir að tvö ár hafi liðið glímir Andrea enn við þá lífsreynslu. Hún hefur gert róttækar breytingar á lífi sínu og starfar nú sem blaðamaður. Til að dreifa huganum reynir hún að vinna sem mest. Lík ungbarns finnst í frystikistu og áður en Andrea veit af er hún komin á bólakaf í ...

Síðustu dagar móður minnar eftir Sölva Björn Sigurðsson. Þetta er saga um samband mæðgina, líf og dauða, einsemdar og ástar - ferðalag sem reynist allt þetta í senn: gráglettið og tregafullt, innilegt og fyndið.

ÞÞ -  í forheimskunnarlandi, eftir Pétur Gunnarsson. Hér er seinna bindið um Þórberg Þórðarson - hið fyrra, ÞÞ - í fátæktarlandi, hlaut frábærar viðtökur 2007. 

Harmleikur í Héðinsfirði: mannskæðasta flugslys á Íslandi, eftir Margréti Þóru Þórsdóttur. Í maí 1947 fóst flugvél í Héðinsfirði með 25 manns, þar af nokkur börn...

Jólaminningar: hátíð ljóssins í huga íslendinga, Jónas Ragnarsson skráði. Frásagnir um jólin á árum áður, rætt við tólf þjóðþekkta Íslendinga um minningar frá bernskujólunum og rifjaður upp tíðarandinn í jólamánuðinum frá upphafi til loka tuttugustu aldar.

Elfa Gísla og hinar sögurnar, Anna Ólafsdóttir Björnsson skráði. Elfa hefur ávallt þurft að standa á eigin fótum þótt ýmsir hafi fyrst og fremst tengt hana við karlmennina í lífi hennar. Hún ólst upp í Reykjavík, Keflavík, í biblíubeltinu í Bandaríkjunum og flutti ótal sinnum í æsku. Er hún sneri heim til Íslands, átján ára gömul, lenti hún fljótlega í hringiðu tísku, leiklistar, umtals og ástamála.

Nektarmyndin eftir Helga Jónsson. Valur er frægur ljósmyndari. Hann tekur myndir af fallegu landslagi - og ungum stúlkum á laun. Hann tekur nektarmyndir af Fjólu Lind og þær birtast í vinsælu tímariti og á netinu... 

Rúnagaldur eftir Elías Snæland Jónsson. Þegar Melkorka Steingrímsdóttir sjónvarpsfréttamaður leitar sannleikans um leynilega fortíð afa síns, keppast miskunnarlausir andstæðingar við að verða á undan henni að finna fornan rúnalykil...

Mynd af Ragnari í Smára eftir Jón Karl Helgason. Hann var goðsögn í lifanda lífi; kraftmikill sveitastrákur úr Flóanum sem gerðist iðnrekandi, bókaútgefandi, málverkasafnari og lífið og sálin í íslensku tónlistarlífi um áratugaskeið.

Sá á skjöld hvítan: viðtalsbók við Jón Böðvarsson, Guðrún Guðlaugsdóttir skráði. Jón Böðvarsson hefur haldið mörg fornritanámskeið og farið með þátttakendur í ferðir á fjarlægar slóðir víkinga. Á þeim vettvangi hefur hann unnið frumkvöðlastarf. En Jón er fjarri því allur þar sem hann er séður, í honum búa margir menn...

Kona þriggja eyja: ævisaga Ásu Guðmundsdóttur Wright, skráð af Ingu Dóru Björnsdóttur. Ása var læknisdóttir úr Stykkishólmi sem hélt ung til Englands þar sem hún lærði hjúkrun, tók þátt í aðgerðum kvenréttindakvenna og saumaði sér kjól úr gardínuefni sem hún klæddist þegar hún gekk fyrir konung. Hún giftist breskum lögfræðingi og varð hefðarfrú í Cornwall, en þau fluttu síðar til Trínidad og keyptu sér búgarð inni í frumskógi. 

Orðin sem aldrei voru sögð eftir Þorlák Má Árnason. Þetta er söguleg og litrík skáldsaga sem byggir á sjóslysi sem varð við Vestmannaeyjar í mars 1979. Fjórir menn fórust í slysinu. Sagan segir frá fjölskyldu skipstjórans sem lifði slysið og lífi hennar á eftir.

Týnda táknið eftir Dan Brown. Sögusviðið er Washington og leyndir þræðir frímúrarareglunnar...

Umsátrið: fall Íslands og endurreisn eftir Styrmi Gunnarsson, en hann hefur um áratuga skeið haft beinan aðgang að ráðamönnum í stjórnmálum og atvinnulífi. Einstök bók um aðdraganda þess að Ísland hrundi, upplýsingar úr innsta hring...

Söknuður: Vilhjálmur Vilhjálmsson, Jón Ólafsson skráði. Vilhjálmur lét lífið í bílslysi aðeins 33 ára gamall. Lög hans hörfðu smogið svo kirfilega að hjartarórum þjóðarinnar að fólki fannst sem það hefði misst nákominn ættingja...

Hvar ertu nú? eftir Mary higgins Clarc. Heillandi saga ungrar konu sem reynir að leysa ráðgátu sem orðin er að fjölskylduharmleik... Sem áður fer þessi vinsæli höfundur á kostum.

Loftkastalinn sem hrundi eftir Stieg Larsson. Lisbeth Salander á harma að hefna - gegn manninum sem reyndi að myrða hana og stofnunum sem tókst næstum að eyðileggja líf hennar. Hún er á gjörgæslu, grunuð um þrjú morð og eitt morðtilræði...

Sjúddirarí rei: endurminningar Gylfa Ægissonar, skráð af Sólmundi Hólm Sólmundarsyni. Gylfi fæddist ekki með gullskeið í munni...var kominn á sjó strax á unglingsaldri og þvældist um landið þvert og endilangt. Hann byrjaði ungur að drekka og varð óreglumaður...

Horfðu á mig eftir Yrsu Sigurðardóttir. Þóra lögmaður reynir að fá upptekið aftur mál fatlaðs manns sem vistaður er á réttargeðdeildinni á Sogni fyrir að kveikja í sambýli með skelfilegum afleiðingum. Ungum útvarpsmanni berast torkennileg skilaboð og ógnvekjandi símtöl... og látin stúlka sækir í að standa við fyrirheit um að passa lítinn dreng. Saman fléttast þessir þræðir í glæpasögu sem fær hárin til að rísa!

Góði elskhuginn eftir Steinunni Sigurðardóttur. á kaldri vetrarnóttu er löngu brottfluttur Íslendingur allt í einu staddur fyrir utan heimili æskuástarinnar, á Seltjarnarnesi. þau áttu saman sjö mánuði fyrri sautján árum en hafa ekki sést síðan. hún hefur aldrei vikið úr huga hans. Hvað gerist í nótt? Ævilok eða nýtt upphaf?

Íslenska undrabarnið: saga órunnar Ashkenazy, Elín Albertsdóttir skráði. Þórunn var undrabarn og aðeins þriggja ára lék hún fyrst opinberlega á píanó. Hér er lýst hvernig hún framfleytti fjölskyldu sinni barnung með tónleikahaldi á Íslandi á hverju sumri og þeim erfiðleikum sem fjölskylda hennar glímdi við í Lundúnum og fáir vissu af. Þórunn hitti síðar og kynntist Vladimir Ashkenazy í Moskvu og...

Útkall við Látrabjarg eftir Óttar Sveinsson. Fimmtán Bretar berjast fyrir lífi sínu í miskunnarlausu brimróti á togaranum Doon, sem er strandaður undir klakabrynjuðum veggjum Látrabjargs.

Öll þau klukknaköll: frásagnir 25 prestkvenna, ritstjórn: Anna Sigurkarlsdóttir, Ágúst Sigurðsson og Guðrún L. Ásgeirsdóttir. Viðtöl við eiginkonur presta víða um land, bæði úr handriti frá 1980 og eftir útvarpsviðtölum. Ágrip af sögu Prestkvennafélags Íslands.

Vigdís: kona verður forseti eftir Pál Valsson. Hver er saga þeirrar konu sem heillaði ekki bara landa sína í hlutverki forseta, heldur hálfa heimsbyggðina um leið, með framkomu sinni, hlýju viðmóti og snjöllum orðum? Hér er ítarlega fjallað um uppvöxt hennar og fjölskyldu, áhrifavalda, mótunaröfl og þau áföll...

Þjófur, fíkill, falsari eftir Guðberg Guðmundsson, sem hér rekur æviferil sinn frá því að hann ólst upp í Reykjavík og síðar í Garðinum á fimmta og sjötta áratug síðustu aldar. Guðberg hóf ungur afbrotaferil sinn, var fyrst dæmdur á Litla-Hraun sautján ára...

Í fótspor afa míns eftir Finnboga Hermannsson. Sögusviðið er Reykjavík eftirstríðsáranna og lýðveldið Ísland. Fornir lífshættir og fljúgandi nýjungar berjast um athygli sögumannsins og aldamótaþorpið á Njálsgötunni tekur að riðlast. þessi bók er annað bindið í þríleiknum sem kenndur er við afahúsið á Njálsgötunni, sú fyrsta var Í húsi afa míns og kom út í fyrra.

Auður eftir Vilborgu Davíðsdóttur. Auður djúpúðga er í hópi þekktustu landnema Íslands. Hér kynnumst við henni á unga aldri og fylgjum henni inn í stormasamt hjónaband með Ólafi hvíta Dyflinnarkonungi.

Karlsvagninn eftir Kristínu Marju Baldursdóttur. Þegar Gunnur vaknar hefur heimili hennar verið rænt. Hún flýr í sumarbústaðinn sinn og með henni fer unglingsstúlka sem hún þekkir afar lítið. Þetta verður óvenjuleg helgi...

Bragð í baráttunni: matur sem vinnur gegn krabbameini eftir Richard Béliveau & Denis Gingras. á undanförnum árum hefur fólk áttað sig æ betur á að holl og hæfileg næring er einn grundvallarþáttur góðrar heilsu. Rannsóknir hafa leitt í ljós að jafnvel er unnt að verjast ákveðnum sjúkdómum með skynsamlegu fæðuvali, eða að minnsta kosti draga mjög úr líkum á að þeir nái að grafa um sig.

Jón Leifs -  líf í tónum -  eftir Árna Heimi Ingólfsson. Jón Leifs var einn merkasti og óvenjulegasti listamaður Íslands á 20. öld. Í miðri heimsstyrjöldinni fyrri sigldi hann til Þýskalands, aðeins 17 ára, staðráðinn í að leggja tónlistina fyrir sig þótt ekki hefði hann nema óljósan grun um hvað í því fælist.

Snorri: ævisaga Snorra sturlusonar 1179-1241 eftir Óskar Guðmundsson. Hér er sögð saga mikilhæfs manns sem þurfti að kljást við konunga í útlöndum, höfðingja heima fyrir, börnin sín og breyskleika sína.En þessi maður sem barðist við heiminn fyrir átta öldum sigraði hann líka með bókmenntunum.

Grjótaþorp: þar sem lýðræðið læstist ofan í skúffu eftir Sigurjón R. Vikarsson. Sagan fjallar um lítið samfélag suður með sjó, þar sem Sjálfsgæðisflokkurinn ræður ríkjum og leiðtogi þeirra Hásteinn ríkir sem Jörundur forðum daga.

Hvíti tígurinn eftir Aravind Adiga. Balram Halwai er frumkvöðull, þjónn, hugsuður og morðingi – í senn siðblint ljúfmenni og auðmjúkur fantur. Hann brýst úr fjötrum þorpsins sem ól hann og fjölskyldunnar sem kúgaði hann til þess eins að lenda undir hælum annarra þrælahaldara í stórborginni.
Hvíti Tígurinn er snilldarlega skrifuð saga um napran veruleika Indlands, saga um spillingu, örbirgð, kúgun, stéttaskiptingu og viðurstyggð sem viðgengst jafnt meðal fátækra og ríkra.
Aravind Adiga hlaut hin heimsþekktu Booker-verðlaun 2008 fyrir bókina sem hefur komið út víða um heim við miklar vinsældir.

Leikur engilsins eftir Carlos Ruiz Zafón, höfund Skugga vindsins. Saga um bækur, ófyrirsjánleg áhrif þeirra og anda, eins og fyrri skáldsaga höfundar. Ógleymanleg saga um yfirnáttúrulega atburði, hamslausar ástríður, hús í álögum, öngstræti og myrka króka og kima hinnar fögru Barcelónaborgar.

Kaupalkinn í New York eftir Sophie Kinsella. Þessi bók er sjálfstætt framhald af Draumaveröld kaupalkans, um hina jákvæðu og hrifnæmu Becky, sem segir kannski ekki alltaf alveg satt, en er samt alltaf jafn einlæg og heillandi.

Hjartsláttur: Hjálmar Jónsson með aðstoð Kolbrúnar Bergsdóttur. Hjálmar lýsir hér glímunni við Guð, prestskap í Húnavatnssýslu, Skagafirði og í Reykjavík, fjallar um eftirminnileg ár á Alþingi og segir frá ýmsu sem gerðist þar að tjaldabaki.

Gæska eftir Eirík Örn Norðdahl. Gæska er ótrúlega hugmyndarík og fyndin skáldsaga um allt sem skorti á Íslandi síðustu ár; jafnrétti, bræðralag og meðalhóf - og allt hitt sem nóg var af: græðgi, heimsku og fordóma. Ímyndunarafl höfundar halda engin bönd og hér nýtur stílgáfa hans sín til fulls.

Milli mjalta og messu eftir Önnu Kristine Magnúsdóttur. Gestir í hinum vinsæla útvarpsþætti Önnu, Milli mjalta og messu, voru tæpir 500.  Í þessari bók segja fimm þeirra sögu sína.  Fríkirkjupresturinn hefur umburðarlyndi að leiðarljósi, ung kona er strútabóndi í Suður-Afríku, einn af 24 bestu ljósmyndurum veraldar bregður upp myndum í orðum, rafvirkinn og miðillinn eiga það sameiginlegt að þurfa að kunna tengja og kona sem missti stóran hluta fjölskyldu sinnar í snjólflóði segir frá afleiðingum þess á líf hennar.
Viðmælendurnir eru:  Séra Hjörtur Magni Jóhannsson, Unnur Berglind Guðmundsdóttir, Ragnar Axelsson (RAX),  Skúli Lórenzson og Erla Jóhannsdóttir.  Þau veita okkur hér innsýn í ævintýralegt líf sitt.

Chicago eftir Alaa Al-Aswany. Ástríður, trúmál, peningar og pólitík eru drifkraftarnir í þessari skáldsögu. Hér segir frá lífi Egypta við nám og störf í læknadeild Háskólans í Illinois og Ameríkönum sem þeim tengjast. Yacoubian-byggingin sem kom út 2007 er eftir sama höfund.

Föndur-jól: skrautlegt og skemmtilegt jólaföndur eftir Rúnu Gísladóttur. Skýrar leiðbeiningar og skemmtilegar hugmyndir: jólatré, bjöllur, stjörnur, englar og jólasveinar, svo dæmi sé tekið.

Enginn ræður för: reisubók úr neðra eftir Runólf Ágússon. Hér er reisubók manns sem heldur yfir þvera Ástralíu. Þar kynnist hann ífsháttum frumbyggja sem fyrrum voru skotnir á færi, horfðist í augu við kengúru, keyrir niður kóalabjörn og gistir í neðanjarðarbæ. Þetta er einlæg, áleitin og bráðfyndin lesning, uppfull af fróðleik um framandi slóðir.

Himinninn yfir Þingvöllum eftir Steinar Braga. Þrír ungir menn. Þrjár ungar konur. Þrír ólíkir heimar: Reykjavík, frönsku Alparnir og yfirgefinn borpallur í eyðimörk. Alls staðar ríkir örvænting, ærandi þögn og djúp einsemd sem leiðir til furðulegra atburða og óhæfuverka. Í þremur grípandi sögum kannar rithöfundurinn Steinar Bragi mörk mennsku og ómennsku og samband veruleika og óra af sama næmi og í skáldsögunni Konum sem hlaut fádæma góðar viðtökur, þar á meðal þrjá fimm stjörnu dóma í dagblöðum landsins. Þetta er sjötta skáldsaga Steinars Braga en margir hafa beðið hennar með eftirvæntingu.

Dóttir mæðra minna: saga úr stríði, eftir Sindra Freysson. Dansinn dunar á Ísafirði þegar hermenn með alvæpni ganga þar á land á bjartri sumarnótt árið 1941. Þeir stilla upp vélbyssum og handtaka sjö heimamenn. Þeirra á meðal er Kristín Eva, 17 ára stúlka, og móðir hennar. Síðar um nóttina eru þær fluttar ásamt hinum föngunum til stríðshrjáðs Englands, sakaðar um að vera óvinir ríkisins.
Þar bíður þeirra fangelsi um óvissa tíð. Í prísundinni spinnur Kristín Eva áhrifamikla og átakanlega sögu kynmóður sinnar; konunnar sem gaf hana forðum. Og utan múranna geisar styrjöld - rétt eins og innan þeirra.
Sindri Freysson ritar hér kröftuga sögu um innilokaðar konur, glæpi sem aldrei fyrnast og sakleysi sem glatast og verður aldrei endurheimt. Sindri fékk Bókmennataverðlaun Halldórs Laxness árið 1998 og síðasta skáldsaga hans, Flóttinn, hlaut einróma lof gagnrýnenda.

Hið fullkomna landslag eftir Rögnu Sigurðardóttur. Hanna snýr heim frá Amsterdam til að taka við starfi hjá listasafni borgarinnar. Það er góðæri á Íslandi og auðmenn njóta þess að gefa safninu dýrar gjafir. Ein slík er landslagsmálverk með birkitrjám eftir þekkta listakonu frá öldinni sem leið. Gallinn er sá að forvörðurinn á safninu, ráðgátan Steinn, telur að myndin sé fölsuð.
Ragna Sigurðardóttir rithöfundur er einnig myndlistarmaður og listgagnrýnandi. Í þessari nýstárlegu skáldsögu um glæp nýtir hún sér innsýn sína í myndlistarheiminn á einstakan hátt. Lifandi persónur listamanna og innanhússfólks í íslenskum og alþjóðlegum listheimi mætast í átökum sem stjórnast af metnaði, græðgi og svikum – og ástríðu fyrir listinni.

Hyldýpi eftir Stefán Mána. Fjórir ungir drengir róa í leyfisleysi út á stórt stöðuvatn. Einn þeirra fellur útbyrðis og er nærri því drukknaður. Ofan í vatninu birtist nakin stelpa, bjarthærð og grönn, og réttir honum svartan hlut. Sjálfur er drengurinn með myrkur í maganum, myrkur sem þrífst á þögn og ótta og mun einn daginn toga hann aftur til sín. Tíu árum síðar gerast dularfullir atburðir: Tvö ungmenni hverfa sama dag, piltur og stúlka. Pilturinn finnst nærri dauða en lífi en ekkert spyrst til stúlkunnar. Hann ákveður að leita hennar en hversdagsleikinn breytist í botnlaust hyldýpi og leitin verður fljótt að martröð sem engan enda ætlar að taka …

Sex grunaðir eftir Vikas Swarup. Vicky Rai, sonur umdeilds ráðherra á Indlandi, er skotinn til bana í eigin veislu þar sem skrautlegur hópur fólks fagnar með honum sýknudómi vegna morðákæru. Lögreglan kemst fljótt að því að sumir gestanna komu óboðnir og jafnvel með byssu í fórum sínum. Sex manns eru teknir...

Vormenn Íslands eftir Mikael Torfason, er í senn spennusaga og fjölskyldusaga verkafólks í Breiðholti. Fyndin, tregafull og beinskeytt ádeila á nútímasamfélag.

Reyndu aftur: ævisaga Magnúsar Eiríkssonar tónlistarmanns, skráð af Tómasi Hermannssyni. Magnús hefur verið einn ástsælasti laga- og textasmiður íslensku þjóðarinnar í bráðum fjóra áratugi og eru hugarsmíðar hans fyrir löngu orðnar hluti af þjóðarsálinni. "Langmest djúsi íslenska rokkævisaga sem ég hef nokkurn tímann lesið". (Dr. Gunni)

Prívat og persónulega eftir Birgi Sigurðsson, er hlaðin óstýrlátum tilfinningum, djúpri alvöru og ísmeygilegri kímni. En umfram allt leiðir hún fram ósvikið fólk af holdi og blóði, beint úr kviku lífsins. Snarlifandi og stórskemmtileg lesning.

Svo skal dansa: skáldsaga úr veruleikanum eftir Bjarna Harðarson. "Við vorum löngu búnar að fá kosningarétt og kaupið hafði tosast í áttina við það sem var hjá karlpungunum. Það var meira að segja litið svo á að við mættum eiga peninga sjálfar. En við máttum ekki eiga líf".

Enn er morgunn eftir Böðvar Guðmundsson. Í góulok 1936 kemur til Reykjavíkur unfur þýskur tónlistarmaður að nafni Jóhannes Kohlhaas. Hann er af gyðingættum og hefur á ævintýralegan hátt hrakist undan nasistum, sem fara mikinn í heimalandi hans. Menningarlíf hins unga höfðustaðar nýtur hæfileika Jóhannesar, hann aðlagast fljótt og finnur ástina.

Harmur englanna eftir Jón Kalman Stefánsson, er sjálfstætt framhald Himnaríkis og helvítis sem út kom árið 2007. Tíminn er stundum bölvað kvikindi, færir okkur allt til þess eins að taka það burt aftur. Það eru þrjár vikur síðan strákurinn kom í Plássið með stórhættulegan skáldskap á bakinu og...

Fölsk nóta eftir Ragnar Jónasson. Þegar Ari Þór Arason fær himinháan erlendan greiðslukortareikning sem hann kannast ekkert við tekur líf hans algjörum stakkaskiptum. Reikningurinn er nýlegur og virðist hafa átt að berast föður og alnafna Ara sem hvarf með dularfullum hætti mörgum árum fyrr, þegar Ari var barn að aldri. Hann ákveður að leita skýringa á þessum undarlega reikningi – og um leið heldur hann á vit fortíðarinnar í leit að sannleikanum um föður sinn. Hvers vegna hvarf hann sporlaust? Hvernig gat hann skilið eiginkonu og son eftir í einsemd og sorg? Hvar er hann niður kominn? Eða var hann kannski myrtur – og hver vildi hann þá feigan?

Ævintýraeyjan: uppgangur og endalok fjármálaveldis eftir Ármann Þorvaldsson. Hér er ótrúlegum vexti Kaupþings lýst - þegar það breyttist úr smáfyrirtæki í langöflugasta og verðmætasta fyrirtæki landsins á rúmum áratug. Hér segir innanbúðarmaður frá mörgum stærstu viðskiptum Íslandssögunnar og því sem gerðist á bak við tjöldin. Brugðið er nýju ljósi á fjölda þjóðkunnra einstaklinga, þar á meðal Björgólf Thor Björgólfsson, Davíð Oddsson, Hannes Smárason, Jón Ásgeir Jóhannesson, Bakkavararbræður, Kára Stefánsson og Sigurð Einarsson.

Sólstjakar eftir Viktor Örn Ingólfsson. Sagan gerist að hluta til í Þýskalandi þegar afar óvenjulegt morð er framið í íslenska sendiráðinu í Berlín. Á skrifstofu sendiherrans situr vafasamur viðskiptajöfur dauður - myrtur. Hver átti sökótt við þennan mann? Og hvernig komst morðvopnið inn um öflugt öryggishlið norrænu sendiráðanna?
Lögreglumaðurinn Birkir Li Hinriksson er sendur ásamt félögum sínum til Berlínar til að hefja rannsókn málsins. En þrátt fyrir þröngt leiksvið og fáa grunaða reynist málið flókið því rætur þess ná langt aftur í tímann. Íslenska lögregluliðið má hafa sig allt við að grafast fyrir um þær og koma í veg fyrir að fleiri falli í valinn.

Haukur á Röðli: í fúlustu alvöru, Birgitta H. Halldórsdóttir skráði. Hér er að finna ótrúlegar bernskulýsingar sérstæðs Húnvetnings sem hefur fengið að smakka á ýmsu í lífinu. Hann missti ungur foreldra sína og fékk að kynnast lífsbaráttunni í stórum hópi systkina á kreppuárunum.  Sagt er frá stríðsárunum, lífreið undan fallbyssukúlum bandamanna, dvöl í Hólaskóla þar sem margt var brallað, hvernig hann falsaði sitt eigið kennsluvottorð til bílprófs (hann varð síðar ökukennari til margra ára!) og ók inn í skólann á amerískum Farmalltraktor. Ennfremur segir Haukur frá starfi sínu sem bóndi, vélamaður, gorkarl og skemmtikraftur og lýsir samferðarmönnum sínum og nágrönnum á óborganlegan hátt.

Raddir frá Kúbu eftir ýmsar konur frá Kúbu. Hér er á ferðinni 14 smásögur sem skrifaðar eru á áratugunum eftir byltinguna. Þær eru fjölbreyttar að stíl og efni, fjalla um líf og dauða, ást og hatur, sorg og gleði, en einnig um lífsbaráttuna á Kúbu og flótta frá eyjunni.

Reimleikar: íslenskar draugasögur, Guðjón Ingi Eiríksson tók saman. Ekki fyrir viðkvæmar sálir!

Ljóðasafn 1978-2008 eftir Sjón. Sigurjón Birgir Sigurðsson hefur skrifað margar bækur - m.a. skáldsögur og ljóð, sem hann hefur fengið ýmsar tilnefningar og verðlaun fyrir, m.a. Bókmenntaverðlaun Norðurlandaráðs 2005 fyrir Skugga-Baldur.

Stúlkan sem lék sér að eldinum eftir Stieg Larsson. Þetta er framhald bókarinnar Karlar sem hata konur, en nú er Lisbeth Salander í aðalhlutverki. Afar spennandi bók.

Ástandsbarnið eftir Camilla Läckberg. Hér eru það fjölskylduleyndarmál Ericu Falck sem koma upp á yfirborðið meðan lögreglan í Tanumshede þarf að komast af án Patriks Hedeström, sem er í feðraorlofi. Höfundur fléttar heillandi frásögn af atburðum í lífi ungrar konu á fimmta áratugnum listilega saman við samtímann.

Eitt sinn gangster ávallt gangster eftir Josh Bazell. Peter Brown er ungur læknakandiat með fortíð. Einn daginn staldrar hann við á leið til vinnu sinnar á sjúkrahúsi á Manhattan til að horfa á dúfu berjast við rottu og einhver hálfviti reynir að ræna hann. Sá hefði betur látið þð ógert. En þetta slær tóninn fyrir daginn...

Afl hugans ekkert leyndarmál: sjónmyndun - leiðbeiningar og hugmyndir eftir Irmu Lauridsen. Þetta er bókin um það hvernig þú getur með sjónmyndun hugsað líkama þinn heilbrigðan og hug þinn glaðan og verið í andlegu jafnvægi. Í bókinni eru mismunandi aðferðir kenndar við sjónmyndun á einfaldan hátt.

Mannlaus veröld eftir Alan Weisman. Í þessari einstöku bók veltir höfundur fyrir sér hvað myndi gerast á jörðunni ef mannskepnan hyrfi en allt annað kyrrt á sínum stað. Hvað yrði um öll mannvirkin okkar og eiturefnin sem við höfum búið til? Hvernig myndi dýrum og gróðri farast í mannlausri veröld? Höfum við unnið óbætanlegan skaða á lofti, hafi og jörð eða er heiminum viðbjargandi? 

Íslenskar hafnir og hafnargerð útgefin af Siglingamálastofnun. Hér er sögð saga hafnarframkvæmda á Íslandi frá því laust fyrir aldamótin 1900 til samtímans. Handbók - ekki til útláns

Svartbók kommúnismans: glæpir/ofsóknir/kúgun eftir Stépane Courtois og fl. Kommúnisminn var einn afdrifaríkasti þátturinn í sögu tuttugustu aldar. Eftir fall hans í Mið- og Austur-Evrópu varð aðgangur að upplýsingum greiðari, ekki síst í skjalasöfnum, sem áður voru lokuð. Það hafa höfundar þessara bókar nýtt sér, og áætla þeir, að kommúnisminn hafi kostað hátt í 100 milljónir manna lífið...

Hlýjar hendur: vettlingauppskriftir eftir Ágústu Þóru Jónsdóttir. 53 prjónauppskriftir að vettlingum og grifflum í öllum stærðum og gerðum handa unglingum, börnum og fullorðnu fólki.

Á mannamáli - ofbeldi á Íslandi eftir Þórdísi Elvu Þorvaldsdóttur. Ofbeldisbrotum hefur fjölgað á Íslandi sé tekið mið af opinberum tölum. Fjölgunin hefur verið uggvænlegust í þeim málum sem enn eru sveipuð mestri þögn: kynferðisbrotamálum. Enn loða ranghugmyndir við þá glæpi og í umræðunni afhjúpast gríðarleg óánægja fólks með stöðu mála.

Óskabörn: ættleiðingar á Íslandi eftir Sigrúnu M. Kristinsdóttur. Höfundur, sem er blaðamaður og verðandi móðir, tekur hér saman mikilvægar upplýsingar fyrir verðandi kjörforeldra um ættleiðinguna, t.d. umsókn foreldra, ferðir út til að sækja börnin, þroska barnanna og uppeldi. Einnig er fjallað um huglægu þættina og þær tilfinningar og hugsanir sem bærast innra með börnunum og kjörforeldrum.

Á grænum grundum eftir Anne B. Ragde (skáldsaga). Þriðja og síðasta bókin um sundurleitu fjölskylduna á Neshov, flækjur hennar og leyndarmál. Hinar eru Berlínaraspirnar og Kuðungakrabbarnir, sem hafa notið mikilla vinsælda.

September í Shiraz er æsispennandi frumraun rithöfundarins Daliu Sofer sem fædd er í Íran, en flúði þaðan ásamt fjölskyldu sinni þegar hún var tíu ára, eftir að klerkastjórnin komst þar til valda og faðir hennar var handtekinn. Sagan sem er lauslega byggð á eigin reynslu höfundar lýsir á magnþrunginn hátt bæði styrk mannsandans en einnig veikleikum hans, hverfulleika sjálfsins en jafnframt órjúfanlegum böndum fjölskyldunnar, ættartengsla og uppruna.

Heitar laugar á Íslandi eftir Jón G. Snæland og Þóru Sigurbjörnsdóttur (handbók). Hér greinir bæði frá ósnortnum náttúrulaugum og manngerðum laugum sem skemmtilegt er að skoða og njóta. Þær eru bæði í byggð og í óbyggðum...

Alltaf sama sagan eftir Þórarinn Eldjárn, hefur að geyma 11 sögur um fólk og margvíslegar furður í fortíð, nútíð og framtíð. Skálmæltur hundur kemur við sögu, eldforn Saab, dularfullur kauði og glataður hamar; bylting verður í íþróttalífi landsmanna, sagt er frá draugagangi og mannraunum og eins er spurt: Hvað ef...?

Laura og Julio eftir Juan José Millás (skáldsaga). Hjónaleysin Laura og Julio eignast náinn vin þegar Manuel flytur í íbúðina við hliðina á þeim. Manuel er heillandi glæsimenni og rithöfundur - þótt hann hafi aldrei skrifað bók. það myndast tómarúm í lífi hjónaleysanna þegar Manuel lendir í slysi og liggur í dauðadái á spítala.

Rauðbrystingur eftir Jo Nesbö (skáldsaga). Eftir óhapp við skyldustörf er Harry Hole sestur bakvið skrifborð í öryggisþjónustunni með bunka af skýrslum til yfirlestrar. Hann staldrar við tilkynningu þess efnis að úti í skógi hafi fundist tóm skothylki úr stóreflis þýskum veiðiriffli af sjaldgæfri gerð... Besta norska glæpasagan að mati NRK og norskra lesenda.

Handbók um hugarfar kúa: skáldfræðisaga eftir Bergsvein Birgisson (skáldsaga). Ungur menningarfræðingur snýr heim eftir strangt nám í útlöndum. Á ráðningarskrifstofum er horft á hann með hluttekningu og hann spurður hvort hann hafi "komið eitthvað fram"? Að lokum fær hann þó í gegnum klíku það verkefni að gera handrit að heimildarmynd um íslensku kúna ...

Hús moskunnar eftir Kader Abdolah (skáldsaga). Nútíminn er tekinn að berja að dyrum í Íran eftir aldalanga stöðnun. Undir kyrrlátu yfirborðinu, á bak við blæjurnar og innan moskunnar, leynast draumar og vonir, ástríður og ólgandi tilfinningar. Hér er á ferð átakanleg en hlý frásögn af örlögum einnar fjölskydu og um leið heillar þjóðar á miklum umbrotatímum.

DeNiro og ég eftir Rawi Hage. Bókin hlaut alþjóðlegu IMPAC-Bókmenntaverðlaunin 2008. Það geisar borgarastríð í Beirút. Bassam og George eru æskuvinir; þegar þeir voru pattar söfnuðu þeir tómum skothylkjum og seldu fyrir sígarettur. Mörgum árum og tíu þúsund sprengjum síðar dreymir Bassam um að flýja til Rómar þar sem meira að segja dúfurnar eru hamingjusamar og vel haldnar.

Prjónað á börnin: 2 - 10 ára/Lene Holm Samsöe (handavinna).

Aftur til kreppuhagfræði: Krísan 2008 eftir Paul Krugman. Höfundur er prófessor í hagfræði og alþjóðagjaldeyrismálum við Princetonháskóla og hlaut Nóberlsverðlaun í hagfræði árið 2008. Hér fjallar hann um hrunið og kreppuna frá því um 1930 og spyr spurninga um aðgerðir og aðgerðarleysi og áhrifin sem af hlutust.

Sofandi að feigðarósi eftir Ólaf Arnarson. Einhver mestu tíðindi lýðveldissögunnar virðast hafa komið eins og þruma úr heiðskíru lofti yfir íslenskt samfélag. Var það svo í raun? Eða hafði háværum viðvörunarbjöllum verið hringt án þess að nokkur gæfi þeim gaum?

Hrunið eftir Guðna Th. Jóhannesson sagnfræðing, er fyrsta heildaryfirlitið yfir íslenska efnahagshrunið og eftirmál þess - allt frá því að óveðursský lánsfjárkreppu tóku að hrannast upp erlendis og þar til ríkisstjórnin fór frá völdum.

Hvað er Íslandi fyrir bestu? - tengsl Íslands og Evrópusambandsins eftir Björn Bjarnason. Hér er samansafn greina þar sem glímt er við margar spurningar, m.a. hver er staða Íslands í hnattvæðingunni? Hvað felst í þátttöku Íslands í Schengensamstarfinu? Hvaða aðferðum ber að beita við töku ákvaðana um Evrópusamstarfið? Hverra kosta völ eiga íslendingar í gjaldmiðilsmálum?

Inni eða úti? - aðildarviðræður við Evrópusambandið eftir Auðunn Arnórsson. Hér eru teknar saman upplýsingar um það ferli sem fer í gang er ríki sækir um aðild að Evrópusambandinu og um lærdóm sem draga má af fyrri stækkunarlotum sambandsins. Tilgangurinn er að gera íslenskum lesendum kleift að glöggva sig á þessu með aðgengilegum hætti...

Ný framtíðarsýn: nýir stjórnahættir við endurreisn atvinnulífsins eftir Þorkel Sigurlaugsson. Þar er fjallað um nauðsyn þess að þjóðin móti sér nýja framtíðarsýn við endurreisn efnahagslífsins þar sem.a. bætt viðskiptasiðferði, sjálfbærni og nýsköpun eru höfð að leiðarljósi.