Í núgildandi lögum um grunnskóla (2008, 2. grein) segir að grunnskólinn skuli leitast við að haga störfum sínum í sem fyllsta samræmi við eðli og þarfir nemenda og stuðla að alhliða þroska, heilbrigði og menntun hvers og eins. Í 17. grein laganna segir að nemendur sem eiga erfitt með nám sökum sértækra námsörðugleika, tilfinningalegra eða félagslegra örðugleika og/eða fötlunar sbr. 2. gr. laga um málefni fatlaðra, nemendur með leshömlun, langveikir nemendur og aðrir nemendur með heilsutengdar sérþarfir eiga rétt á sérstökum stuðningi í námi í samræmi við metnar sérþarfir. Í Hópsskóla er litið svo á að öll kennsla skuli vera sérkennsla og reynt til hins ítrasta að tryggja nemendum námsaðstæður og námsefni sem henta getu, þroska og áhuga hvers og eins.