Í aðalnámskrá grunnskóla segir að námsmat miðist að því að afla vitneskju um árangur skólastarfsins og hvernig einstökum nemendum eða hópum gengur að ná settum markmiðum. Megintilgangur námsmats er því sá að afla upplýsinga sem hjálpa nemendum við námið, örva þá og hvetja til að leggja sig enn betur fram. Námsmat á að veita nemendum og foreldrum og forráðamönnum þeirra, kennurum, viðtökuskólum og skólayfirvöldum upplýsingar um námsgengi nemenda (Aðalnámskrá grunnskóla, 2006).

Aðferðir við námsmat í Hópsskóla
Námsmat fer að jafnaði fram tvisvar sinnum á hverju skólaári. Fyrra matið fer fram í janúar og það seinna í júní. Með námsmati er reynt að komast að því hvort nemandi eða nemendahópur hefur náð þeim markmiðum sem að er stefnt eða hversu vel hann hefur nálgast þau. Námsmatið á að vera heiðarlegt og sanngjarnt og eingöngu í samræmi við markmiðssetningu. Það getur farið fram verklega, skriflega eða munnlega.

Skólinn hefur aðgang að greinandi prófum og öðrum mælitækjum sem auðvelda könnun á tilteknum þáttum náms og kennslu. Stöðluð lestrarpróf, stærðfræðipróf, hreyfiþroskapróf, lesskimunarpróf, staðlaðir spurningalistar og fleiri slík mælitæki eru notuð við námsmat. Lögð er áhersla á munnlegan vitnisburð auk skriflegs vitnisburðar. Námsmatið er fjölbreytt, formlegt og óformlegt og tekur alltaf mið af markmiðssetningum. Matið er svo kallað leiðsagnarmat sem er uppbyggjandi og nytsamlegt umbótamat sem setur nemandann og nám hans í brennidepil. Endurgjöfin hefur skýran tilgang, er greinandi, jákvæð, styðjandi og gagnleg. Leiðsagnarmat getur tekið mið af:

> Viðtölum við einstaklinga eða hópa
> Sjálfsmati
> Jafningjamati
> Námsmöppum
> Dagbókum
> Gátlistum
> Munnlegum eða skriflegum prófum
> Könnunum
> Matslistum
> Hljóðupptökum
> Myndbandsupptökum

Leiðsagnarmat stuðlar að jákvæðum samskiptum kennara og nemenda, aukinni virkni nemenda, aukinni hæfni við sjálfsmat og jafningjamat og aukinni námsfærni.

Endurgjöfin er í formi skriflegra umsagna og samtala við nemendur og foreldra/forráðamanna.