• mið. 22. feb. 2012

Metnaðarfullir búningar á öskudaginn!

Litskrúðugir búningar, keyptir og heimagerðir ásamt náttfötum, var klæðnaður nemenda skólans í dag. Tilefnið var að sjálfsögðu öskudagurinn. Bæði unglingastig og miðstig fékk að slá köttinn úr tunnunni og fengu allir veglega nammipoka eftir að nemendum tókst að tæta „tunnuna" í tvennt. Tunnukóngurinn á unglingastiginu var Gabríel í 7.U og á miðstiginu var það Árni Magni í 5.S. Meðfylgjandi myndir voru teknar í dag. Þar má að sjálfsögðu sjá vinningsbúningana líka.

• mið. 22. feb. 2012

Að loknum lestrarspretti

Fyrir stuttu lauk lestrarspretti í Hópsskóla. Nemendur stóðu sig með stakri prýði en alls lásu þeir 714 bækur á 2 vikum. Á þessu tímabili kynntust nemendur m.a. þeim bræðrum Jóni Oddi og Jóni Bjarna en áhersla var lögð á að kynna nemendum verk höfundarins Guðrúnar Helgadóttur. Á meðan á lestrarsprettinum stóð fengum við í heimsókn höfundinn Evu Rún Þorgeirsdóttur sem kom og las úr bók sinni Auður og gamla tréð. Í bókinni eru að finna góðar útskýringar á jógastöðum svo börn og fullorðnir geta prófað sig áfram en sagan hvetur til hreyfinga og getur aukið sjálfstraust barna og hugarró.