UMBÓTA - OG ÞRÓUNARSTÖRF SKÓLAÁRIÐ 2011 - 2012
• Innra mat
• Uppbyggingarstefnan - uppeldi til ábyrgðar
• Af heilum hug - fjölbreyttir kennsluhættir
• Fjölsmiðja
• Lestrarkennsla/lestrarstefna
• Comeniusarverkefni - „ Let´s taste Europe "
• Heimanámsstefna Grunnskóla Grindavíkur
• Stærðfræðikennsla á unglingastigi
INNRA MAT
Samkvæmt gildandi grunnskólalögum ber grunnskólum að framkvæma kerfisbundið sjálfsmat. Tilgangur þess er að kanna hvort markmiðum skólans hefur verið náð, greina sterka og veika þætti í skólastarfinu og skapa þannig grunn að umbótum. Sjálfsmatið verður stöðugt að vera í gangi og er langtímamiðað. Með því fer fram víðtæk gagnasöfnun um skólastarfið. Sjálfsmat skóla er því leið til þess að miðla þekkingu á skólastarfi og er liður í þróun og vexti hvers skóla. Sjálfsmat, umbætur og mat á þeim eru því lykill að því að gera góðan skóla betri.
Skólar geta valið hvaða aðferðum þeir beita í sjálfsmatsvinnunni. Ákveðin viðmið sem skólum er ætlað að uppfylla í sjálfsmatsvinnunni eru gefin út á vegum ráðuneytisins svo og leiðbeiningar um sjálfsmat. Til að mat teljist uppfylla viðmið laga þarf það að vera formlegt, altækt, áreiðanlegt, samstarfsmiðað, umbótamiðað, árangursmiðað, stofnana- og einstaklingsmiðað, lýsandi, greinandi og opinbert.
Sjálfsmatið í Grunnskóla Grindavíkur er byggt á skoska sjálfsmatskerfinu HOW GOOD IS OUR SCHOOL sem ber heitið GÆÐAGREINAR í íslenskri þýðingu. Skólaárið 2011 - 2012 munu Kristín Mogensen, Guðrún Inga Bragadóttir og Sigríður Fjóla Benónýsdóttir hafa yfirumsjón með vinnu við sjálfsmatið. Starfsfólks skólans fer í náms - og kynnisferð til Glasgow dagana 6. - 11. október . Þar fær starfsfólk kynningu á HOW GOOD IS OUR SCHOOL. Hópurinn heldur áfram að vinna með gæðagreinana samkvæmt 3ja ára áætlun og leggur fyrir foreldrakönnun í 2., 4., 7. og 10. bekk í nóvember 2011. Eftirfarandi gæðagreinar verða teknir fyrir skólaárið 2011-2012:
Samvinna og búnaður:
Gæðagreinir 8
Áhrif á nemendur:
Gæðagreinir 2
Forysta:
Gæðagreinir 9
Þegar lokið hefur verið við að vinna úr hverri könnun fyrir sig eru niðurstöður dregnar saman og kynntar starfsfólki . Síðan er gerð þróunaráætlun, en þar kemur fram hver viðbrögðin skuli verða, hvenær þeim skuli lokið og hver beri ábyrgð á því að þau verði gerð.
UPPBYGGINGASTEFNAN - UPPELDI TIL ÁBYRGÐAR
Áfram verður haldið með vinnu við Uppbyggingastefnuna í skólastarfi byggir á markvissum hugmyndum sem í felast bæði aðferðir og stefnumótun skóla til bættra samskipta.
Meginatriðið er að kenna börnum og unglingum sjálfsaga og ýta undir sjálfstraust.Vísað er til ábyrgðar hvers og eins á sjálfum sér, á eigin orðum og gerðum.Aðferðin miðar að því að bæta úr því, sem aflaga fer í samskiptum, og að nemendur læri þannig af mistökum sínum.Uppbyggingaraðferðin hjálpar til við:
• að skilja eigin hegðun
• geta jafnað ágreining og vaxa af því
• að leiðrétta eigin mistök
• að sættast við aðra
• að komast fljótt í jafnvægi eftir að hafa misst stjórn á sér
Skólaárið 2011 - 2012 munu Valdís Kristinsdóttir , Ellert Sig. Magnússon og Svava Agnarsdóttir stýra vinnu með uppbyggingarstefnuna, markmiðið er að gera stefnuna sýnilegri í daglegu starfi og þróa starfið áfram.
AF HEILUM HUG - FJÖLBREYTTIR KENNSLUHÆTTIR
Haustið 2010 fór af stað þróunarverkefni í Grunnskóla Grindavíkur sem er ætlað að:
• auka fjölbreytni kennsluhátta í skólastarfinu
• efla kennara í að skoða sjálfa sig m.t.t. kennsluaðferða sem þeir nýta kennslu
• auka öryggi og áræðni kennara við að nýta fjölbreyttar leiðir í kennslu og fjölbreyttar nálganir á viðfangsefnum
• auka fjölbreytni í námsmati samhliða fjölbreyttum kennsluháttum
• auka áhuga nemenda og koma enn betur til móts við ólíkar þarfir þeirra
• virkja þá reynslu, færni og þekkingu sem er í kennarahópnum miðla sín á milli
Til verkefnisins fékkst styrkur úr Skólaþróunarsjóði Grindavíkur. Verkefnið hlaut heitið Af heilum hug sem er vísan til þess að kennarahópurinn vinni af heilum hug að því að leita leiða til að bæta sig í starfi og mæta ólíkum þörfum nemenda. Allir kennarar skólans taka þátt í verkefninu og gerðu fyrstu áætlanir ráð fyrir því að ljúka verkefninu vorið 2011. Ákveðið var að halda áfram með verkefnið skólaárið 2011 -2012. Ingvar Sigurgeirsson prófessor Menntavísindasviðs Háskóla Íslands er ráðgefandi í þessari vinnu. Innan skólans er teymi skipað þeim Viktoríu Róbertsdóttur og Petrínu Baldursdóttur sem heldur utan um skipulag og vinnu í tengslum við verkefnið.
FJÖLSMIÐJA - VALÁFANGI Á UNGLINGASTIGI
Um er að ræða samvinnuverkefni Grunnskóla Grindavíkur, félagsmiðstöðvarinnar Þrumunnar í Grindavík, Félags handverksfólks í Grindavík og frístunda- og menningarfulltrúa Grindavíkurbæjar. Fjölsmiðjan fékk eina milljón króna í styrk frá RHA til framþróunar verksins.
Fjölsmiðjan er valgrein fyrir nemendur úr elstu bekkjum í Grunnskóla Grindavíkur. Lögð er áhersla á verklega þætti í skólastarfinu. Markmiðið er að styðja við nemendur á þann hátt að þeir öðlist styrkan grunn í verk- og listgreinum. Gengið er út frá fjölgreindarkenningum Gardners en þar er gert ráð fyrir því að greindirnar séu margar og vegi allar jafn þungt. Allir nemendur eigi sér sterkar hliðar og þvi er slagorð Fjölsmiðjunnar: Enginn getur allt en allir geta eitthvað. Benný Ósk Jökulsdóttir, Rósa Signý Baldursdóttir og Pálmi Ingólfsson leiða starfið fyrir hönd Grunnskóla Grindavíkur skólaárið 2011 - 2012.
LESTUR/LESSKILNINGUR, LESTRARSTEFNA
Skólaárið 2011 - 2012 verður unnið með lestur og lesskilning og mótuð lestrarstefna fyrir skólann. Þessi vinna mun verða undir leiðsögn Bjarnfríðar Jónsdóttur sérkennsluráðgjafa á Skólaskrifstofu. Með henni munu leiða vinnuna Bryndís Hauksdóttir, Ólöf Bolladóttir og Sigurveig Margrét Önundardóttir.
COMENIUS - MATUR OG MATARGERÐ
Hópsskóli vinnur að Evrópuverkefni sem kennt er við Comeniusar áætlunina. Ásamt Hópsskóla vinna kennarar og nemendur frá Tékklandi, Póllandi, Rúmeníu, Skotlandi, Þýskalandi og Frakklandi saman að verkefninu. Pólland sér um verkstjórn.
Verkefnið tengist mat og matargerð. Útbúa á sameiginlega mataruppskriftabók þar sem matarhefðir hverrar þjóðar koma fram.
Áfram verður unnið að þessu verkefni á þessu skólaári og lýkur því í maí 2012. Fulltrúar frá Hópsskóla munu fara á þrjá samstarfsfundi á skólaárinu, í september verður fundað í Skotlandi, í desember í Frakklandi og lokafundurinn verður í maí í Þýskalandi. Ásrún Kristinsdóttir deildarstjóri 1. - 3. bekkjar stýrir verkefninu en allt starfsfólk Hópsskóla kemur að verkinu með einhverjum hætti.
HEIMANÁMSSTEFNA
Síðastliðið skólaár var unnið að því að móta heimanámsstefnu fyrir skólann. Sú vinna er langt á veg komin en á haustmánuðum verður verkinu væntanlega formlega lokið og heimanámsstefnan birt og kynnt.
STÆRÐFRÆÐIKENNSLA Á UNGLINGASTIGI
Skólaárið 2011 - 2012 mun fara fram endurskoðun á stærðfræðikennslu á unglingastigi. Í mörg ár gekk afar vel í stærðfræði á unglingastigi og góður árangur á samræmdum prófum en síðastliðin 3 ár hefur hallað undan fæti og munu stærðfræðikennarar á stiginu vinna að því að kortleggja málið og finna lausnir. Vinnunni stýra þeir Ellert Sig. Magnússon, Ægir Viktorsson og Frímann Ólafsson.
• Fyrirhugað er að fara í gegnum Aðalnámskrá og skoða hana og hvaða þætti við erum ekki að uppfylla og munum við síðan setja upp skipulag sem sér til þess að búið sé að fara yfir alla þætti í hverjum árgangi þannig að fyrir samræmd próf verðum við búin að uppfylla alla þætti fyrir prófið
• Farið verður yfir námsefnið átta - tíu og almenna stærðfræði I-III og ákveðið hvort við munum nota á næstu árum.
• Námsáætlun verður gerð og beinagrind frá Heiðaskóla notuð í þeirri vinnu. Ætlum við að gera glósur úr hverjum kafla allra bóka (leiðarbók) þar sem þær verða notaðar sem innlögn ásamt þeim hugtökum sem tilheyra hverjum kafla. Að lokinni vinnu í hverjum kafla munu nemendur gera Hugtakakort um það sem þau lærðu í kaflanum. Glósurnar verða settar í sérstaka stílabók/leiðarbók sem fylgir nemendum frá 8. bekk upp í 10. bekk.
• Hugmynd um að skoða einnig námsmat og gera matskvarða fyrir alla stærðfræðina á unglingastigi þannig að allir viti hvað liggur að baki námsmatsins. Spurning hvort ekki eigi að fastsetja mat t.d. kennaramat, sjálfsmat, foreldramat og jafningjamat.
• Fyrirhugað er einnig að fara í gegnum samræmd próf síðustu ára og búa til verkefnabanka úr þeim sem nýtist nemendum sem upprifjun fyrir prófin.
11,5 °C)
