Eftirfarandi valgreinar stóðu nemendum í 8., 9. og 10. bekk til boða fyrir skólaárið 2011 - 2012:

Árshátíð - leikrit
Nemendur sinna einhvers konar undirbúningi fyrir árshátíð. Einnig er öll þátttaka í árshátíðarleikritinu metið í þessum valáfanga.

Blaða- og fréttamennska
Nemendur læra að skrifa texta, bæði viðtalsgreinar og fréttir. Lögð verður áhersla á rétt málfar, vel ritaðan og hnitmiðaðan texta þar sem nemendur læra að draga fram aðalatriðin. Nemendur fá innsýn bæði í heim blaðamennskunnar og þeirra ljósvakamiðla sem tengjast fréttum. Nemendur gefa út skólablað í lok áfangans og skila auk þess ýmsum verkefnum sem snúa að bæði greina- og fréttaskrifum. Nemendur læra viðtalstækni, taka viðtöl, hljóðrita þau og afrita.

Danskar kvikmyndir/þættir
Danir eru framarlega í kvikmyndagerð og hafa verið að vinna til alþjóðlegra verðlauna á undanförnum árum. Nægir að nefna sjónvarpsþáttaraðirnar Ørnen og Nikolaj og Julie ásamt kvikmyndunum Festen, Babettes Gæstebud, Palle Erobreren, Nattevagten, Idioterne o.fl. Horft verður á fjölbreytt úrval kvikmynda, t.d. barnamyndir, unglingamyndir, spennumyndir, teiknimyndir og ástarrmyndir. Markmiðið er að horfa og njóta.

Enska framhald
Markmiðið með þessum valkosti er að gefa nemendum, sem standa vel að vígi í náminu, kost á að auka hraða sinn og ljúka námsefninu fyrr en ella. Þeir fá stuðning við þessa vinnu á lokanámskeiðinu.
Kennari í viðkomandi fagi metur hvort nemandi er tilbúinn að standast eftirfarandi kröfur:
Nemendur þurfa að halda einkunnum fyrir ofan 9 í námsgreininni.
Námið í námsgreininni má ekki draga úr námsárangri í öðrum greinum.
Nemendur þurfa að vera tilbúnir til að takast á við aukið heimanám í námsgreininni og hraða yfirferð sem byggir líka á námsáætlanagerð og sjálfstæðum vinnubrögðum.

Enskar bækur og kvikmyndir
Nemendur og kennari velja saman bækur sem gerðar hafa verið kvikmyndir um. Bækurnar eru lesnar og síðan er horft á kvikmyndirnar. Þá eru unnin verkefni í tengslum við viðfangsefnið.
Þessi valgrein er góð til að auka skilning og orðaforða nemenda á enskri tungu og er ætluð öllum nemendum sem hafa áhuga.

Fjölsmiðja (2 stundir allan veturinn)
Námið felst aðallega í því að horft er til verklegra þátta í skólastarfinu. Markmiðið er að styðja við nemendur á þann hátt að þeir öðlist styrkan grunn í verk- og listgreinum og verða þannig undir það búnir að fara í framhaldsnám á því sviði eða öðlist færni til að takast á við þessa mikilvægu þætti í framtíðinni. Einnig verður lagt mikið upp úr mannlegum samskiptum og að samvera í kennslustundum sé afslöppuð og heimilisleg. Þá verður lögð áhersla á skipulögð vinnubrögð og að allir öryggisþættir í verknáminu séu í lagi.
Greinar sem rúmast innan fjölsmiðjunnar eru m.a. glervinna, gifsvinna, graffiti, grímugerð, leðurvinna, málmsmíði, málmsuða, mósaikgerð, Silfursmíði, skartgripagerð, tálgun, tréútskurður o.fl.

Ganga - Útivist
Nemendur ganga með kennara um nágrenni Grindavíkur og njóta útvistar hvernig sem viðrar. Reynt verður að kynnast helstu gönguleiðum sem taka ekki meira en 80 mínútur. Þá er mikilvægt að nemendur læri að klæða sig eftir veðri og hafi góða gönguskó. Þá er reynt að sýna fram á hvað ganga og útvist er heilbrigð fyrir líkama og sál. Hugsanlega verður farið í lengri gönguferðir en þá fellur niður tími síðar sem því nemur.

Golfkennsla
Farið verður í undirstöðuatriði golfíþróttarinnar. Kennslan fer að einhverju leyti fyrir utan skólann og í næsta nágrenni hans. Farið verðu á æfingasvæði við Víðihlíð og hugsanlega á golfvöllinn sjálfan. Æskilegt era ð viðkomandi útvegi sér eigið golfsett (að hluta eða heild). Viðeigandi klæðnaður er áskilinn.

Heilsa og næring
Markmiðið er að nemendur kynnist heilbrigðum lífsháttum og fjölbreyttri hreyfingu og læri að bera ábyrgð á hollu mataræði.

Heimanám/lestur
Í heimanámi/lestri gefst nemendum kostur á að vinna við óunnið heimanám og fengið aðstoð við ýmis verkefni. Ef nemendur telja sig vera búnir með allt heimanám þegar að þessum stundum kemur, er ekki veitt leyfi úr þeim því þá eiga nemendur að lesa í bókmenntum að eigin vali eða vinna sér í haginn í náminu.

Heimilisfræði - bakstur/léttir réttir/erlendir réttir/heilsuréttir.
Nemendur auka þekkingu sína í næringarfræði, þjálfast í að beita helstu matreiðsluaðferðum og geta framreitt máltíð sjálfstætt. Um fjölbreytta matreiðslu er að ræða og framreiðsla miðuð við mismunandi tækifæri. Unnið verður með tækifærisrétti frá ýmsum löndum. Einnig er lagt uppúr hugmyndaflugi og skapandi hugsun við matargerð.

Hreyfimyndagerð
Unnið verður með Flash forritið og fleiri sem eflir áhuga nemenda á gerð ýmissa hreyfimynda.

Hreyfing og leikir
Nemendur fái góða alhliða hreyfingu í gegnum þátttöku ýmissa leikja, s.s. skotbolta, brennibolta, fótbolta og körfubolta o.fl. Gert er ráð fyrir að hreyfingin fari fram að lang mestu leyti utandyra.

Íslenska - ritun
Farið verður í uppbyggingu ritunar og gerðar æfingar í mismunandi tegundum hennar. Eins er reynt að aðstoða við smásagnagerð o.fl. Ritunin verður að miklu leyti kennd á tölvur.

Íslenskar kvikmyndir
Nemendur og kennari velja saman íslenskar kvikmyndir og síðan er horft á þær. Þá eru unnin verkefni í tengslum við viðfangsefnið.

Lego
Smíðaðir verða robotar úr legokubbum og þeim stjórnað úr þar til gerðum forritum.

Leiklist
Undirstaða leiklistar kennd og æfð, s.s. framburður, framkoma og leikræn tjáning.

Leirvinna
Nemendur kynnast því hvernig móta á úr leir. Unnið er með steinleir og læra nemendur að fletja leirinn út, teikna mynstur og þrykkja mynstur í leirinn. Nemendur læra einnig að skreyta og glerja leirinn.

Myndmennt - teikning/teiknimyndasögur/málun
Teikningar unnar með mismunandi teikniblýöntum, skyggingar kenndar, teiknað eftir uppstillingum, vatnslitað með blandaðri tækni, málað á striga ef kostur er o.fl.

Náttúrufræði - tilraunir
Tilgangur er að stuðla að auknum áhuga og hagnýtingu nemenda á raunvísindum og rökhugsun. Þetta gerist m.a. með því að nemandinn upplifir ánægjuna af því að skilja náttúrulögmálin, samhengi hlutanna í umhverfi sínu á verklegan og bóklegan hátt og með því að benda á hagnýtinguna.Uppbygging á tímum:Að nemendur taki þátt í að framkvæma tilraunir eða upplifa náttúruvísindi og lögð verður áhersla á umræður, samvinnu, upplifun, athugunum, sköpun, túlkun, söfnun upplýsinga og skráningu niðurstaða.

Náttúrufræði - útikennsla
Gert er ráð fyrir að kennslan fari að mestu leyti fram utandyra í nágrenni skólans. Reynt verður að setja upp verkefni sem tengjast náttúrunni á einhvern hátt og nærumhverfið nýtt til þess. Einnig er hugsanlegt að söfn og eftirtektarverðir staðir í Grindavík verði heimsóttir þar sem reynt er að koma auga á fjölbreytileika náttúrunnar.

Photoshop
Farið verður í þetta skemmtilega myndvinnsluforrit og unnin raunhæf verkefni sem koma að notum í framtíðinni.

Ræðumennska
Kennd verða undirstöðuatriði ræðumennskunnar. Stuðst verður við leiðbeiningar frá Morfís þar sem sett verða upp ræðulið til að fjalla um málefni sem efst eru á baugi hverju sinni. Hugsanlega verður sett saman lið sem keppir fyrir hönd skólans í ræðukeppni grunnskólanna á Suðurnesjum.

Skák
Skák er góð þjálfun fyrir einbeitingu og rökhugsun. Lögð verður áhersla á að tefla í tímunum en jafnframt að dýpka skilning nemenda með því að fara í byrjanir, miðtafl og endatafl. Þá er stefnt að því að fá heimsóknir, fara í vettvangsferðir og taka þátt í skákmótum.

Skólahreysti
Stefnt er að því að nemendur skilji mikilvægi þess að hreyfa sig reglulega og kynnist almennri heilsurækt. Einnig er stefnt að því að nemendur bæti sig og nái góðum árangri í keppnisgreinum Skólahreysti. Þá hafa þeir sem eru þátttakendur möguleika á að verða fulltrúar Grunnskóla Grindavíkur í Skólahreysti. Kennsla verður að mestu leyti verkleg þ.e. æfingar í sal og kynnisferðir og hugsanlega fengnir góðir gestir í heimsókn.

Spil og leikir
Kynning á spilum og leikjum af ýmsu tagi, má þar nefna: Spil eins og kana, vist, brids, Trivial pursuit, ratleikir, útileikir o.fl. Markmiðið er að fá nemendur til þess að uppgötva gleðina sem felst í því að spila og leika sér.

Stelputímar
Reynt verður að skapa fjölbreytta umræðu á þeim málum sem liggja á áhugasviði margra stúlkna. Þar ber að nefna samskipti, framkomu, tísku, förðun, hár, húð og hreinlæti. Eins er gert ráð fyrir að förðunarfræðingur o.fl. heimsæki hópinn. Þá koma upp hlutir eins og tölvur, íþróttir, tónlist o.fl.

Strákatímar
Reynt verður að skapa fjölbreytta umræðu á þeim málum sem liggja á áhugasviði margra drengja. Þar ber m.a. að nefna samskipti, framkomu, hár, húð og hreinlæti. Eins koma upp hlutir eins og tölvur, íþróttir, tónlist o.fl.

Stærðfræði framhald
Markmiðið með þessum valkosti er að gefa nemendum, sem standa vel að vígi í náminu, kost á að auka hraða sinn og ljúka námsefninu fyrr en ella. Þeir fá stuðning við þessa vinnu á lokanámskeiðinu.
Kennari í viðkomandi fagi metur hvort nemandi er tilbúinn að standast eftirfarandi kröfur:
Nemendur þurfa að halda einkunnum fyrir ofan 9 í námsgreininni.
Námið í námsgreininni má ekki draga úr námsárangri í öðrum greinum.
Nemendur þurfa að vera tilbúnir til að takast á við aukið heimanám í námsgreininni og hraða yfirferð sem byggir líka á námsáætlanagerð og sjálfstæðum vinnubrögðum.

Stærðfræðikeppni - stærðfræðikeppni
Meginmarkmið þessa áfanga er að undirbúa nemendur til þátttöku í stærðfræðikeppni grunnskólanna á Suðurnesjum. Farið verður yfir og æfðar þrautir frá eldri keppnum. Þeir sem velja þennan áfanga munu taka þátt í stærðfræðikeppni skóla á Suðurnesjum síðar á skólaárinu.

Stærðfræðikeppni - þrautir
Farið verður yfir stærðfræðiþrautir og reynt þannig að auka skilning á fjölbreytileika stærðfræðinnar og auka rökhugsun. Auk þess sem farið verður á netið og fundnar ýmsar þrautir þar til að glíma við.

Stærðfræði - upprifjun
Áhersla er lögð á að rifja upp ýmis atriði úr námsefni yngri bekkja. Valgreinin er frekar ætluð þeim nemendum sem ekki hafa náð tilætluðum árangri í stærðfræði og vilja gera sérstakt átak til að bæta úr því.

Textílmennt - prjón/hekl/fatasumur/hönnun/þæfing
Nemendur þjálfaðir í sjálfstæðri vinnu, hönnun og útfærslu eigin verka sem og að temja sér vandvirkni, góða umgengni og rétta meðferð áhalda og véla. Markmið kennslunnar eru ennfremur að nemendur læri að taka mál og finna rétta sniðastærð. Auki við kunnáttu í fatasaumi, fái innsýn í þæfingu og þjálfi prjón eða hekl, svo eitthvað sé nefnt.
Verkefni verða valin með tillit til samsetningu hópa þar sem að hugsanlegt er að árgangarnir blandist.

Tæknimennt
Í tæknimennt fá nemendur tækifæri til að smíða ákveðinn hlut í samráði við kennara.
Í slíku verkefni fá nemendur að þjálfa sig í notkun verkfæra.

Vinnustaðaval (fyrir áramót)
Almennt er um það að ræða að nemandi er í umsjón ákveðins aðila á vinnustað á Grindavíkursvæðinu sem sér um að veita honum innsýn inn í starfið, hvaða menntun þarf til að sinna starfinu, vinnutíma o.fl. Hann leyfir nemanda, eftir því sem við verður komið, að spreyta sig sjálfur. Vinnustaðavalið verður að vera raunhæft miðað við það starfsumhverfi sem við búum við hér í bæ.
Námsráðgjafi sér um að koma nemendum fyrir hjá vinnuveitendum. Hann fer yfir almenn atriði sem snúa að launþegum og hvernig maður undirbýr sig til þess að sækja um vinnu.
Einu sinni til tvisvar hittir hann nemendur og fer yfir stöðu mála.

Annað nám sem metið er sem tvær valgreinastundir ef nemendur óska þess:

Félagsstarf
Þátttaka þeirra sem taka virkan þátt í félagsstarfi utan skólans og í skóla næsta vetur. T.a.m. þeirra sem ætla að bjóða sig fram til nemendaráðs, Þrumuráðs, íþóttaráðs, útgáfu á skólablaði o.fl. Hér er í raun verið að meta þann mikla tíma og þann mikla lærdóm sem felst í að taka þátt í félagsstarfi, til jafns við annað nám.

Tónlistarnám/Annað nám
Nám í tónlistarskóla eða öðrum skólum. Að fenginni staðfestingu frá viðkomandi skóla um ástundun.

Björgunarsveitin
Nemandi verður að vera skráður í unglingadeildina Hafbjörgu og vera virkur þátttakandi í þeirra starfi. Staðfesting fyrir ástundun skal liggja fyrir. Aðeins fyrir 9. og 10.bekk.

Íþróttaiðkun
Regluleg ástundun íþrótta. Viðkomandi þarf a.m.k. að mæta að meðaltali tvisvar í viku í viðurkennda íþróttaþjálfun. Staðfesting um ástundun frá þjálfara skal liggja fyrir.

Framhaldaskólaáfangar í ensku, stærðfræði og rafmagni
Eingöngu ætlað nemendum úr 10.bekk.

Gert er ráð fyrir að nemendur fari með skólabifreið frá Grindavík í Fjölbrautaskóla Suðurnesja og með
FS-rútunni heim að loknum kennslustundum. Ef fjöldi nemenda er meiri en skólabifreið tekur getur verið að bæjaryfirvöld rukki fyrir fargjaldið. Nauðsynlegt er fyrir nemendur sem velja áfanga í FS að vinna sjálfstætt og mæta í allar kennslustundir. Áfangar í FS eru metnir sem 3 stundir allan veturinn.

ENS-1036 Enska
Áfangalýsing:
Málfræði og orðaforði
Í beinu framhaldi af námi í grunnskóla eru undirstöðuatriði enskrar málfræði, sérstaklega þau atriði sem reynast íslenskum nemendum erfið, rifjuð upp í efnislegu samhengi við aðra þætti námsins. Áhersla er lögð á vandlegan lestur texta með það fyrir augum að byggja upp virkan og hagnýtan orðaforða. Hraðlesið efni valið við hæfi nemenda. Markvissar hlustunaræfingar. Enskt talmál æft m.a. í tengslum við lestrar- og hlustunarefni. Skriflegi þátturinn þjálfaður með fjölbreyttum æfingum í tengslum við þá efnisflokka sem unnið er með. Nemendum leiðbeint í notkun orðabóka.
Lágmarkseinkunn í ensku úr 9. bekk til að komast í þennan áfanga er 8,5 - 9.
Einnig þarf nemandi að hafa tamið sér góð vinnubrögð.

STÆ-1036 Stærðfræði
Áfangalýsing:
Jöfnur, rúmfræði og hlutföll
Lagður er grunnur að vinnubrögðum í stærðfræði, nákvæmni í framsetningu, röksemdafærslum og lausnum verkefna og þrauta. Meginviðfangsefnin eru á sviði rúmfræði en jafnframt er talnameðferð rifjuð upp og jöfnur. Fjallað er um nokkur hugtök evklíðskrar rúmfræði og hlutverk hennar í vestrænni menningu, hnitakerfið og jöfnu beinnar línu. Áhersla er lögð á að varpa ljósi á hlutfallshugtakið frá mörgum hliðum. Auk styttri verkefna vinni nemendur heimadæmi og taki stöðupróf.
Lágmarkseinkunn í stærðfræði úr 9. bekk til að komast í þennan áfanga er 8,5 - 9,0. Einnig þarf nemandi að hafa tamið sér góð vinnubrögð.

RAL 103 Kynning á rafmagni.
Í áfanganum fá nemendur að kynnast störfum rafvirkja og rafeindavirkja auk þess sem handverkfæri eru kynnt og nemendum kennt að nota þau rétt. Farið er m.a. í rafmagnsfræði, rofabúnað og rafeindarásir þar sem nemendur smíða einfaldar rafeindarásir, eins og t.d. blikkara.

Heildartímafjöldi á viku í 8. bekk eru 37 stundir og skiptist sá tímafjöldi niður í kjarnagreinar og valgreinar. Kjarnagreinar eru þær greinar sem allir nemendur taka. Valgreinar eru mismunandi hjá hverjum og einum.
Kjarnagreinar eru 33 stundir á viku en valgreinar 4 stundir á viku.

Heildartímafjöldi á viku í 9. bekk eru 37 stundir og skiptist sá tímafjöldi niður í kjarnagreinar og valgreinar. Kjarnagreinar eru þær greinar sem allir nemendur taka. Valgreinar eru mismunandi hjá hverjum og einum.
Kjarnagreinar eru 31 stund á viku en valgreinar 6 stundir á viku.

Heildartímafjöldi á viku í 10. bekk eru 37 stundir og skiptist sá tímafjöldi niður í kjarnagreinar og valgreinar. Kjarnagreinar eru þær greinar sem allir nemendur taka.
Valgreinar eru mismunandi hjá hverjum og einum.
Kjarnagreinar eru 31 stund á viku en valgreinar 6 stundir á viku.

Breytingar voru gerðar á valinu fyrir veturinn 2011 - 2012. Aðallega er boðið upp á val í námskeiðsformi þar sem flestar valgreinarnar eru kenndar á 8 - 9 vikna tímabilum. Ekki má velja sama fag (nema heimanám/lestur) meira en einn dag í viku.