Gjáin var þétt setin þegar Grindavíkurkvöld bókasafnsins fór fram í gærkvöldi. Þar steig á stokk einvala tónlistarfólk úr Grindavík sem heillaði áhorfendur með tónlist sinni og er óhætt að segja að í Grindavík búi afar hæfileikaríkt tónlistarfólk á öllum aldri. Úr varð frábær söngskemmtun og stemmningin eins og hún gerist best.
Andrea Ævarsdóttir bókasafnsfræðingur og forstöðumaður Bókasafns Grindavíkur var kynnir og sá um undirbúning kvöldsins.
Feðginin Dagbjartur Willardsson og Guðrún Lilja heilluðu alla með frábærum flutningi sínum.
Agnar Steinarsson og Pálmar Örn Guðmundsson fóru á kostum, bæði hvor í sínu lagi og svo saman. Pálmar flutti skemmtileg frumsamin lög sem sannarlega eiga fullt erindi á ljósvakann. Agnar fór með gamanvísur og söng texta sína við þekkt lög.
Arney Sigurbjörnsdóttir er afar hæfileikarík söngkona og sýndi glæsileg tilþrif ásamt unnusta sínum sem spilaði undir á gítar.
Tómas rafvirki sýndi mátt sinn og megin með framúrskarandi flutningi. Feðgarnir Sveinn og Guðjón spiluðu undir. Þeir fluttu m.a. rokklög sem þeir flytja í Grindavíkurkirkju næsta laugardagskvöld.
Hinn fjölþjóðlegi Vísiskór söng bæði á íslensku og pólsku og hleypti inn birtu, hlýju og fjöri. Í lokalaginu, Eyjalaginu Lífið er yndislegt, komu aðrir flytjendur kvöldsins á svið og sungu með kórnum. Margrét Pálsdóttir stjórnaði kórnum af sinni alkunnu innlifun og snilld.
Hér sé stuð! Margrét hvetur gesti til að taka undir með kórnum.
Undirspilið var í sérlega góðum höndum.